Hardangervidda nasjonalpark er 40 år! Fastlands Noreg sin største nasjonalpark ligg på Europa sitt største høgfjells-platå. For eit smykke, for ein historie, for ei oppleving! Les om nasjonalparken i Hardangerfjordmagasinet.
Eit full-vaksinert magasin med gode historier om næringsliv og opplevingar frå øvste hylle, er om ikkje lenge på veg ned i postkassen din. I sommarmagasinet blir det mykje fokus på friluftsliv i ein region som har mykje av det meste innan akkurat det livet, eit liv som betyr så mykje for så mange.
Ullensvang profilerer seg som friluftslivet sin hovudstad. –Kor enn du er i vår kommune, er du nær ei stor oppleving i fri luft. Difor er Ullensvang Noregs friluftshovudstad, seier kommunen sjølv.
Ullensvang fortel deg om bre-landskapet innanfor Folgefonna nasjonalpark, om fruktdyrkar-landskapet og fosse-landskapet. I Ullensvang finn du og kraftfulle kontrastar i det industrielle landskapet.
Har friluftslivet noko å by på i resten av Hardanger? Kan du finna spektakulære friluftsopplevingar i Eidfjord, Ulvik, Voss eller Kvam?
Kva har friluftslivet i Kvinnherad å by på? Klatring i Ulvanosa, Tinde-rangling over Bjørndals-traversen. Besøk på Melderskin, dronninga i Kvinnherad-naturen. Dette er kjente klassikarar og krevjande mål i friluftslivet. Men veit du at Kvinnherad er uendeleg mykje meir enn dei sterke merkevarenamna?
Kva med friluftslivet i Sunnhordland? Friluftsliv er vel mykje meir enn det som føregår over tregrensa. Fjord, holmar og skjer er for mange det ultimate friluftslivet. I Sunnhordlands-bassenget finn du alt du kan drøyma om av friluftsliv knytt til sjø og fjord.
Kanskje her er unike friluftsopplevingar som ikkje ein gong vi i redaksjonen kjenner til?
Vi vil gjerne ha gode innspel frå deg! Send oss gjerne ein e-post.
Juni 2021
