Hopparane fekk applaus, dei fekk ros, beste VM nokon gong – men så blir det avslørt at dei har drive med juks for å nå sine mål. Då snur vinden og rosen stilnar, for vi likar ikkje juks og fanteri. Heilt uakseptabelt er konklusjonen, hopp-jukset er ein skandale.
Då nye Hattebergdalen kraftstasjon opna, fekk sjefane ros. – I ettertid er det avdekka og dokumentert at løyvet til utviding av kraftstasjonen byggjer på juks og fanteri. For å nå sine mål, vart det gjennomført ein heilt uakseptabel prosess. Løyvet til utviding av kraftstasjonen var og er ein skandale.
Hopp-jukset vart ikkje avslørt av sine eigne. Sjølv om det i ettertid kjem fram at det lenge har vore eit miljø, der snuskete haldningar har rådd grunnen. Utan å tøya reglane så kunne ein ikkje nå sine mål, vert det hevda.
Difor måtte hopp-jukset avslørast av tredjepart.
Utviding av kraftstasjonen i Hattebergdalen var sjefen sitt klare mål, eit mål som ikkje kunne realiserast utan å juksa. Dei fleste i kommunestyret hadde ikkje naudsynt innsikt og kompetanse til å avsløra korleis vernevedtaket vart manipulert. Difor vart jukset aldri offentleg avslørt, og dei som stod bak, slapp unna.
Kvifor eg skriv om ei slik gamal sak no?
Fordi temaet er svært aktuelt om dagen. Dei fleste av oss kjenner på at juks og fanteri er ufyseleg, vi likar det ikkje. I tillegg er naturen vår i dag under konstant angrep, mange vil sikra seg våre fellesverdiar til eiga vinning.
Nye planar frå Kvinnherad Energi om meir kraftutbygging i Hattebergdalen, fortel at tida er overmoden for å ta eit kraftig oppgjer med gamal grums, og i tillegg bidra til at ingen skal bli lurt på nytt. Vi set på solid dokumentasjon om at skihopp ikkje er einaste aktiviteten der juks og fanteri har vore naudsynt for å nå sine mål.
Dagens kommunestyre har vist at dei forstår verdien av naturen vår og tek ansvar. Samrøystes vedtak mot nye store kraftlinjer gjennom verna natur. Klart mot bygging av vindmøller i fjella våre. Samrøystes mot konsesjon til Mauranger 2, i alle høve før vi sit att med noko som speglar verdien av det vi gjev frå oss.
No krev tida at vi alle samlar oss rundt fellesskapet sine verdiar med klare krav om at vern av naturen må prioriterast. Vi vil oppmoda, motivera og applaudera dei folkevalde til å stå saman med oss i å prioritera naturen. Saman er vi sterke!
God helg!
